Yann-Ber Guyader

 

Penaos oc'h deuet da vezañ animatour e RKB ?

En un doare fentus a-walc'h peogwir pell zo abaoe ma oa eus Radio Kreiz Breizh e selaouen 'nezhi, ha tout al labour oa bet graet tro-dro da gKazetenn ar Vro Plinn ha tout... An dud zo en em gavet goude, tud gopret. Ha graet e veze dedikasoù war ar radio. Se vije* d'al lun beure. Dont a rae ur plac'h eus Duod, Christiane, evit ober se. Hag ur wech en em gavet klañv. Setu 'vije tremenet bandennoù war ar radio, bep lun beure. Ha se 'noa padet un tamm krogad, ur miz, daou, tri marteze... Ha me, tremen hep dedikasoù bep lun beure 'oa vel tremen hep ma dijuni. Ha 'moa bet pellgomzet da Herve Ar Beg a oa rener ar radio da c'houl' gantañ perak n'eus ket dedikasoù ken, perak ne vez ket lakaet den ebet e plas Christiane.
"Peogwir n'eus den ebet d'en em ginnig betek-henn..."
"Ha ma teufen-me?" lâren de'hañ e' 'mod-se "Ma'teze 'vefe mat."
"Deus, neuze. Lak da anv, ma kerez, hag e vo gwelet 'benn ' nebeud sizhunvezhioù amañ pe vo moaien d'ober pe 'vo ket".
Petra 'moa ket graet ? Biken 'mije soñjet mont dirak ar mikro, erruout 'ba'zh ti an dud, tud a vilieroù o selaou. Hag ha c'hoazh ouzhpenn, an abadenn 'vije prestet da Radio-Kerne hag a oa just o'n em lañsañ. Biskoazh  ! Me 'soñje din 'vije bet un troc'h-raden, ur boomerang 'vel 'vez lâret, skoet 'barzh an aer hag o tont war ma c'hiz,  a-dreuz 'ba ma c'hein. Aet e oan. Lañset e oan. Hag em eus graet se e-pad ur bloavezh mat goude, ur bloavezh hanter, ken ez eo en em gavet un tammoù kudennoù, amañ, 'barzh ar radio. Tout an dud 'oar petra 'oa tremenet amañ. Setu ne  chome 'met un nebeud brezhonegerien ken d'ober abadennoù. Setu on 'n em lañset d'ober abadennoù e-kreiz miz Eost gant ar prezidant a-vremañ, Jañ-Pier Deredel. Setu 'n em lañset hag e oa bet un tamm krogad hag, a-benn ar fin, ma feurm n'ae* ket re vat an traoù hag e oa kinniget ur post-labour din. Hep diviz 'bet, hep arnodenn 'bet da dremen a-raok. Kinniget ar post-labour din ha me lañset war an dachenn. Met, 'pezh eo, 'oa ket aezet, da gentañ, mont e darempred gant an dud. N'haller mont da atersiñ tud 'mod-se, galv* ane', lâr de' " E ! Deus amañ, paotr pe blac'h. Ni 'zo 'vont d'ober ' pennad-kaoz. Me zo 'vont da glask 'barzh da vuhez, me 'zo 'vont da furchal 'ba' 'pezh 'teus graet..." Nann, se zo traoù hag a vez prientet, hag a vez labouret hag a vez selaouet... Mont war an dachenn. Tud eus bed al labour zo aezet da gentañ. Met mont treuzket* arzourien, bed ar sevenadurezh... Se eo bet ma dra diaesañ.

Peogwir ne oac'h ket stummet evit an dra'he ? Ne oac'h ket animatour a-vicher. Petra 'peus graet betek-henn ?

Tamm ebet. Me 'oa labourer-douar. Bet on labourer-douar dre viskoazh, 'boe* ma yaouankiz. Ganet on 'barzh ur feurm. Labouret 'm eus tout ma yaouankiz 'barzh ur feum. Un tamm servij em eus graet 'pad ur bloavezh, ur bloavezh hanter. Goude em eus graet tammoù labourioù a-gleiz hag a-zehou, labourat evit un embregerezh bennaket, evit ur stal bennaket ha deuet war ma c'hiz da labourer-douar pa oan tri, pevar bloaz warnugent. En em zalc'het plom 'barzh ur feurm. Bez' 'm eus bet ur yaouankiz vrav. 'Barzh ar feurm me zo bet savet mat. Bet eo bet brav din. Sell, ha goude on chomet da ramplas ma zud, 'barzh plas daou donton din ha ma mamm. Bez' e oan ur bugel ganet ba' stad-se, 'vel 'vez lâret, savet gant ma mamm hag he daou vreur. Setu me zo chomet eno. Chomet 'barzh ur feurm ma'teze tre 'n desped din dre degouezh. Sell, ma'teze 'zo en em gavet 'mod-se. Pa vez lañset ar mekanik, an traoù 'dalc'h da vont. Setu goude on bet chomet da derc'hel menaj neuze betel bremaik,47 vloaz. Ha goude on bet en darempred gant ar radio evel 'm eus lâret dac'h* ha penaos on degoue'et* 'barzh ar radio.

Petra eo bet an diaesañ evit kregiñ ?

O, an diaesañ eo bet an teknikoù. Da gentañ, a-raok on bet, me, krog 'barzh ar benveg ac'h out krog aze bremañ, 'm eus bet poan-gof. Binvijoù n'eo ket ur forc'h eo, n'eo ket un ostilh, n'eo ket treoù* diwar an natur, traoù ar parkoù, traoù hag a vez'e desket a-raok... Amañ e vez traoù resis, traoù hag a rent ar vouezh, 'rent ar pezh neve* lâret an den, 'pezh a soñj,  'pezh ne vez ket lâret. Ma vez ur cheñchadenn elan* pe ma vez ur c'hoarzh pe ma vez un den o ouelañ... Aze emaint tout e-barzh, rentet hag a zo traoù a-bouez. N'haller ket ober vorzh* petra. Se zo kaoz mont e darempred gant an dud a-raok, a-wechoù, zo un dra a-bouez. Da lâret eo an dra-me-dra*, darn nevo aon dirak ar mikro, darn all a vo diheñchet naet, darn all a vo en o vleud*, darn deus ezhomm da vezañ sikouret. Aze eo hol labour munut da dostaat an dud hep mont 'barzh o buhez. Se zo un dro diarbenn, diavaez dezho, un tamm. Sellet dionte*, hep goñt, ur c'hazetenner, un animatour zo mat d'ober traoù met 'benn ar fin n'eo ket sañset da c'houzout mann ebet. Pa vez graet un atersadenn, ma nez* c'hoant an den kontañ ur pennad eus e vuhez, sekrejoù, bep sort*, a bep sort treoù met hep mont re don 'barzh ar vuhez kuit da furchal. N'eo ket ur furchadeg eo, da glask laou 'barzh penn an dud met lezel an den d'ober ur gaozeadenn, da laoskel 'ne'hañ da gontañ ar pezh en deus c'hoant d'ober, ar pezh a zo en e galon, ar pezh a zo 'ba'n e greiz.

Ha penaos e teuit a-benn da gaout startijenn c'hoazh, bloavezhioù ha bloavezhioù goude ?

Se 'zo 'barzh an nen. Mont e darempred gant an dud. 'Hini n'eo ket gouest da vont e darempred gant an dud 'dalv ket ar boan de'hañ ober ar vicher-se. Se a zo ur vicher da welet, ordin, pelloc'h tra pe dra, den pe den a degaso sklerijenn d'un' all, 'degaso lusk 'barzh an abadenn. Ha gant se e faot mont da glask tud, ya, hag o deus bevet, o deus un dra bennaket da lâret. Lâret e vez a-wechoù zo tud en oad, tud a bep sort, ya, met tud hag o deus bevet traoù da gontañ, istorioù eus o vuhez*, eus o labour, eus 'pezh o deus bevet, tamm pe damm, gant o bugale, gant o familh, 'barzh o labour, war ar maez, 'oar -me... Darn 'vevo kuzh hag o deus ur bern treoù da lâret hag ar re-se eo ne vez ket roet trawalc'h ar gaoz de'. Hag ar re-se 'm eus klasket mont e darempred gante, klask ane' war ur blas foar, 'barzh ur fest-noz, 'skeud ur gaozeadenn. Den-ma-den* a vez kinniget dit."Deus amañ. Hemañ-hen a vefe mat dont da welet. Ha deus an eil deus egile mont e darempred hag an darempred ez eo ar brasañ liamm da gaout tud d'ober abadennoù.

Se zo an ali 'pije c'hoant roiñ d'ar re yaouank pe pije c'hoazh alioù da reiñ d'ar re o deus c'hoant mont war ar vicher...

An hini 'neus c'hoant da vont war ar vicher en deus ezhomm da vezañ stummet, da zont e darempred, pas nemet ganin-me, met gant seurt din-me, tud hag a deus c'hoant d'ober ar vicher-se. A zo tud... Gwelet a ran, gwech ha gwech all eo degouezhet din mont e darempred gant tud yaouank a vefe gouest d'ober al labour met o defe ezhomm da vezañ stummet un tamm, da zont war an dachenn, da deskiñ, da welet, da santout, klevout... Ha se 'zo treoù a zo 'barzh an dud da gentañ. Bez zo dionte met n'int ket stank. 'Maint ket da c'hwennañ evel ar beterabez war ar rengenn nag evit distankañ kaol da blantañ. Met bez' a zo, bez' a zo...

Deskiñ ar pouez-mouezh a zo a-bouez, ivez, evit bezañ gouest da vezañ komprenet mat gant an dud ?

Se zo da diskiñ* ivez. Ar brezhoneg zo liesliv war an dachenn, pa vez komzet eus un terouer. Me zo en em gavet amañ gant ar pezh taol-mouezh Bro-Dreger en deus spontet kalz a dud *boa 'r penn kentañ. Met goude zo brezhoneg da diskiñ, bemdez, bemdez. Bep deiz zo tremenet amañ, bep deiz em eus desket tra pe dra, gant den-ma-den, gant hini pe hini, gant selaou, gant mont e darempred gant an dud ha selaou ar brezhoneg. Ar brezhoneg zo liesliv, da lâret eo pinvi'ik*. Aze zo yezhoù all war an douar met ar brezhoneg a zo pinvi'ik, pinvi'ik.

Pelec'h e vo Yann-Ber Guyader a-benn daou pe dri bloaz amañ ?

N'ouzon ket met c'hoant 'm eus da dihenchañ un tamm. Bremañ 'maon arri gant al lodenn diwezhañ eus ma buhez labour ha 'mije c'hoant d'ober ur "pause" bremañ, da vont pelloc'h, da veajiñ, d'ober treoù all. Met bremañ e vo liammet un tamm gant... ar pezh 'zo, em eus d'ober war-dro ma mamm er gêr a zo erru da bevarzek vloaz ha pevar-ugent hag em eus kemeret ur samm all war ma chouk pa 'm eus divizet miret 'ne'hi er gêr 'm eus divizet kaout ul labour all ouzhpenn.

Peseurt taol kaer ho peus c'hoant kas da benn c'hoazh, e RKB, a-raok echuiñ ?

O...Enrolladennoù bras 'mije bet c'hoant d'ober. Buhezioù tud hag aze 'm eus graet n'eus ket pell zo, pendeogwir oa lidet hanter-kant vloaz kan-ha-diskan ar vreudeur Morvan 'm eus graet un atersadenn 6 eur gante, bet en o zi, gante o zri. Tremenet daou devezh gante. Ha tud on bet e darempred gante, tamm pe damm a'mod-se, dre diarbenn mont da welet ane'e en o zi, mont da welet ane'e en o varkoù*, mont da welet 'ne' war al leurenn, ober ur gaozeadenn gante pa vijent diskennet eus al leurenn, mont da wel' 'ne' na pa vez ken aretiñ pemp munut' 'ba'zh an ti. Hag heñvel gant Marsel Gwillou evel-just. Na dremeno ket a-gostez hag em eus bet digarez da vont e darempred gantañ, pell zo, pell zo... Kas ha kerc'hat anezhañ, 'wechoù, degas anezhañ deus un tu d'un tu all, sikour 'ne'hañ da diskenn ar skalier, roiñ un tamm harp dezhañ, be'añ gantañ, mont d'o'r ur pennad-kaoz gantañ. Ha se ha kalz reoù all. Roger Laouenan 'neus skrivet war ar brezel bras, pe'arzek-triwech, aze, 'mije d'ober un tamm renabliñ gantañ eus ar seizh pe eizh levr 'nefe graet. Maria Prad 'm eus aterset. Valentine Kolleter ha me oar-me c'hoazh, kalz a dud all, tud munut. En tu all da se, an deiz all on bet o welet ur paotr en devoa savet alamantezed ba' Plougonven-Montroulez, du-hont, hag a oa un den speredet hag e oa bet o labourat gant e wreg diavaez, dizoloet gantañ an Normantezed hag en deus kontet din dre ar munudoù, dre ar roudennoù, dre... ar pezh a oa e vuhez pemdeziek. Se 'n hini eo ar gwir vrezhoneg hag ar gwir vuhez da displegañ. Bon, petra implij a vo graet goude ? Met enrollet int kar se zo tud ur wech 'vint aet, ur wech 'vint marv zo pik echu.

Ma 'peus amzer, petra 'rit ur wech m'ho peus echu gant tout ho labour ? Un tamm amzer 'peus 'vit diskuizhañ ? Petra 'rit d'ar poent-se ?

Kousket a ran, mat. Se zo ur pezh lañs d'un nen hag en deus da vezañ prest da adpartiañ eus ar beure, da sevel war an troad mat. Adalek ve'en aet 'ba' ma gwele, 'vel e lâran d'an dud, 'benn daou vunut goude n'eus den ebet. 'Benn on arri 'ba'zh ur bed all. Hag on kad da gousket c'hwec'h eur, seizh eur, eizh eur, nav eur, dre ret, dek eur, hep fiñval hep dont eus ma gwele ha se zo ur pezh lañs din ha pa ran ken 'met mag on pemp eur ba' ma gwele e vin pemp eur kousket ha se zo ul lañs da geñver an dud a glevan a-wechoù tro-dro din amañ. " O, me 'm eus ket kousket venoz*. N'on ket aezet.." Me 'm eus ar chañs-se...

Setu pa n'emaoc'h ket oc'h ober war-dro ho mamm, pa n'emaoc'h ket e RKB, pa n'emaoc'h ket war an hentoù evit atersiñ tud, petra rit c'hoazh ?

Ober war-dro un nebeud saout brizh-du am eus er gêr c'hoazh hag e oan bet krog da sevel ne' 'baoe ur pennad zo. Prenet 'moa div pe deir ha, 'benn ar fin, on 'n 'm gavet da sevel ur vandennad hag em eus bet graet koñkourioù ganto ivez, evel 'm eus graet gant kezeg a-raok. Ar pezh a blij din eo mont d'ober koad. Kaout doujañs evit an natur, pas diskar tout ar pezh a zo war ur c'harzh, met dalcher 'nezhi, darc'hel an natur, diskar koad, mont da brepariñ koad 'vit ar goañv. Dibab koad evit ober meubl...  'N em okupiñ eus tammoù treoù, treoù  'm eus bet miret du-mañ ivez hag a zo chomet a-gostez pell zo hag a dremenan en o c'hichen, evit lâret kazimant bemdez, hag e ve'an  ' soñjal. " Sell amañ zo ur pres e-kichen. Hemañ 'oa poent ingaliñ 'ne'hañ "'M eus ket amzer d'ober. Marteze 'vo graet, marteze ne vo ket. Sell aze penas eo... Ha mont da welet kalz a dud, mignoned hag em mefe c'hoant da dremen ur pennad amzer gante ha 'm eus ket amzer d'ober. Sell aze 'pezh 'vije plijet din ober.

Betek Bro-Afrika ?

O, ya... Ya, ya, sur. Ur veaj... 'Vo ket abred, sur, pa vo graet met graet e vo.

Lakaomp e vefec'h warc'hoazh war un enezenn didud, peseurt levr a yafe ganeoc'h ?

O kalz a leverioù*, rak kinniget zo bet din leverioù da lenn. 'M eus ket bet amzer da lenn. Ha tapet on berr. 'M eus ket kalz a leverioù. N'on ket un den da gat ul levraoueg 'lec'h 'vez berniet treoù, 'lec'h 'vez diskouelet* leverioù renket. Un den dizurzh on. Ha n'on'on ket petra levr 'dapfen, nann...

Bez' emaoc'h tapet e-barzh ur saverez, aze, hoc'h-un', 'pad un eur. Pe, kentoc'h gant unan all. Gant piv 'pije c'hoant bezañ tapet ?

Gant an hini 'degouezhje ganin.Hag en em lakfen e darempred gantañ, pe e vefe kozh pe e vefe yaouank. Mag omp sac'het omp sac'het. N'eus ken nemet gortoz d'ober. Ma 'vez ket nemet un eur n'eo ket ar marv.

E kroc'hen piv ho pije c'hoant bezañ lakaet e-pad ur sizhun, amzer deoc'h kompren peseurt mod eo e vuhez, petra a soñj, petra a ra eus e amzer ?

O.. 'N em lakaat 'ba'zh kroc'hen un' all... Piv 'vefe an den ? Un den hag a sikour ar reoù all. Ya... Da welet... Bez' zo komzet eus l'Abbé Pierre, bez 'zo komzet eus tud all, pas ordin n'eo ket tud a relijion met tud hag a ra un dra bennaket evit ar re all. Hag a zo kad d'ober evit ar reoù all. Met kaer o devez d'ober ha d'ober n'int ket kad d'ober trawalc'h.

Kinniget e vez deoc'h dont en-dro war ar bed-mañ, d'ur mare all hag en ul lec'h all... Pelec'h, pevare 'pije c'hoant dont en-dro, bezañ ganet en-dro ?

O, m'am bije c'hoant da vezañ ganet en-dro... 'Ba'zh Kreiz-Breizh, amañ, ya. An've'out 'raen Bro-Dreger met bremañ, 'boe* 'maon deuet amañ d'ar radio 'm eus graet anaoudegezh c'hoazh donoc'h gant Kreiz-Breizh. Ya, m'am bije bet da addont war an douar, ya, gant un ti 'kreiz ur park...

Ha da beseurt mare, neuze ? Ar bloaz-mañ pe kant vloaz zo, pe daou c'hant vloaz 'zo ?

O, kentoc'h 'ba'zh ar bloavezhioù 50. Ya, ya, m'am bije bet da addont war an douar c'hoazh e vijen deuet 'ba'zh ar mare tost deus ar mare 'oan ganet.

Peseurt hini eo ar c'hrennlavar a blij deoc'h ar muiañ tout ha damber* ?

Olala. Krennlavar... A bep seurt... Tapet berr bep tro. Aze, m'am bije bet soñjet. O, petra 'zo lâret ? Ya, goût a ran kalz krennlavarioù... Pa vez kistion d'ober ur goulenn berr mod-se on tapet, souezhet un tamm. Ya, un' hag a zo plijus a-walc'h... " Mat zo mat met cheñch 'ra vat"

Bez' pije un dra bennak en ho kerz, er gêr pe amañ, a zo didalvoud evit an dud met talvoudus-tre 'vidoc'h, ha na rofec'h da zen ebet, e mod ebet ? Petra eo ?

Traoù munut, ya. 'Wechoù 'vez traoù dister 'walc'h tro-dro din. A-wechoù 'rofen ma dilhad, 'wechoù 'rofen ma roched, 'wechoù 'rofen a bep sort... Met un dra hag a zo du-mañ ha na rofen na 'vit aour na 'vit arc'hant eo ma marc'h, ma loen-kezeg. Ul loen-kezeg 'm eus du-mañ peseogwir 'm eus bet savet loened servij e-pad 25 bloaz, 30 vloaz... Ur marc'h Breizh, 'giz vez lâret hag hesse* na rofen na 'vit aour, na 'vit arc'hant.

Da biv 'pije c'hoant kas ul lizher klemm, hiziv an deiz ?

O, da galz a dud. Da galz a dud 'barzh ar mare 'maon ec'h ober an atersadenn amañ zo klemmoù da gas da galz a dud. An traoù 'zo dizurzh. D'ar pennoù bras, da roiñ mezh de'.

Hag ul lizher gourc'hemnnoù, fougeoù, d'unan bennak ? Da biv e kasfec'h ?

O, hag a zo... Tud 'm eus bet aterset amañ hag em bije bet c'hoant da skrivañ de', da lâret de' pegen prizius 'oa bet o abadenn, pegen brav en nevoa displeget din kalz a dreoù... O ya, da galz a dud ez  zo lizheroù da gas met nann, ne rafen dibab ebet resis, da lâret da biv... 'Ba'zh ma diabarzh, ya, met se 'zo mont en tu all...

Deusgeoñ* zo unan bennak en deus lakaat ar Yann-Bêr Guyader bihan  da zont bras hag en deus roet de'hañ peadra da leuniañ e benn ? Piv 'neus bet kontet kalz vit bezañ ar pezh oc'h, en diavaez d'ho tud, evel-just ?

Ya,o... An've'out 'raen dija ur bern tud, war an dachenn, 'ba' ma bed labour, a-raok ma oan deuet d'ar radio e anve'en ur bern tud. Setu. Hag amañ 'm eus anve'et, amañ 'm eus graet anaouedegezh gant ur bern tud ivez. Tud n'em mije ket bet soñjet e oant ken laouen, tud ken barrek all, tud hag o deus graet traoù munut 'vel 'oan o lâret hag o deus bevet traoù kriz... An dra-se en deus merket a'hon* eo ar c'hampoù-bac'h e Bro-Alamagn, un abadenn 'moa graet gant Yves Leon, un den 'oa bet bac'het ba' Bro'Alamagn ha penaos un den douget evit marv 'oa deuet da vev ha vall*... Ar pezh a zo tremenet, an dra-se, lakaat tud all dindan gwask... Se a gavan spontus gant ar re o deus galloud.

Lakaomp emaoc'h aze dirak bugale, seizh-eizh vloaz, ha c'hoant 'peus roiñ de' ur gentel vuhez. Petra 'pije choant lakaat ne' da glevet ?

O lakaat ne' da diskiñ bevañ 'ba'zh ur vuhez doujañs. Deskiñ an doujañs de'. Alies-tre ' vez klevet ar vugale ' devez kudennoù,  treoù, hag int 'n m bilet hag int krog dija da gaout kalz a dabutoù etrezo. O ya, 'mije c'hoant da diskiñ an doujañs de', da gentañ.

'Vit cheñch un tamm... Peseurt meuz, peseurt boued a rit pa 'maoc'h er gêr hag ho peus c'hoant debriñ trañkil, ha brav ha mat ?

O, petra eo meuz ar Vretoned ? O, patatez, patatez poac'h* ba'r choudourenn*. Amañ 'vez lâret patatez rouzet. Ur choudourennad patatez krilhet.

Petra eo ar pezh na gomprenit ket 'barzh ar bed a zo bremañ tro-dro deomp ? Un dra bennak, da vat, n'oc'h ket evit kompren, ar pezh a blij d'ar re all...

Un dra all c'hoazh ar pezh n'on ket 'vit kompren zo tud o kreviñ gant an naon, da vervel gant an naon. Ha gwashoc'h c'hoazh, bugale. Pa zo kad tud da lakaat gwask war ar vugale, lakaat ane' da labourat adalek 'vint arri 5 pe 6 vloaz, pe vint arri yaouank-tre hag ar re-se zo kad d'ober fall evit ar vugale, war bep seurt danvezioù, war bep seurt hent eus o buhez...

Petra eo ar bravañ ijinadenn a zo bet graet gant Mab-den, hervezoc'h ?

O, n'eus ket pell zo 'oa komzet eus Pierre ha Marie Curie. Ar re-se zo daou den hag o deus dizoloet, ha pa vez komz eus Pasteur ivez, memes mod, zo tud hag o deus merket pep den pendeogwir, 'barzh ar skol, e vije disket dija. Hag e teu ar skeudenn-se 'ba' ma venn din diouzhtu.

Peseurt micher 'pije bet c'hoant d'o'r ha n'ho peus ket graet ?

Ur bern micherioù. Ur bern micherioù nije kaset a'hon war bep seurt tachennoù, ober anaoudegezh eus bed al labour, eus bed an dud, mont e darempred gant an dud hag e tleje bezañ gouest an den da cheñch micher alies 'ba'zh e vuhez. Ha de'hañ, memestra, da viret ur gopr, evel zo dleet un tamm partout, ha beajiñ, dre vras, mont da sikour an dud, dre vras, 'barzh ar micherioù mont da sikour tud klañv, bugale, mont da dennañ tud eus kudennoù ar vuhez war-lerc'h ar brezelioù. Pa vez komz eus un dra m'omp ket lâret. Ar brezel eo bout d'ar re yaouank ar gwask eus an dud vras, eus an dud binvi'ik war ar re baour.

Peseurt donezon 'pije bet c'hoant kaout ha n'ho peus ket bet ?

O, servijet mat on. Ya, ya. Gant se n'on ket da lâret met 'n 'm gavet on un tamm bihan diwezhat war ar vicher. Ya, ma 'm bije bet un tamm galloud da geñveriañ an treoù, d'ar re binvi'ik da roiñ d'ar re baour. Hag ar pezh a vije bet un dra vat eo displegañ d'an dud-se ivez, hag a zo ' vevañ 'barzh ur bed uhel, pa vez gwelet tud hag a zo ken dister all, hag er-maez da gousket a-wechoù, nebeud a voued, sklerijenn 'bet ba'zh o buhez. Lâret d'ar re vras penaos e vev an dud vunut.

Da beseurt goulenn e respontit Ya! Peseurt goulenn e respontit " Ya! " dezhañ hep en em soñjal muioc'h 'vit se ?

N'en em soñjan kazimant gwech ebet. Ma vez goulet ganin, dre vras, ma ve'an kad da reiñ, e lâran ya. Diouzhtu. 'Choman ket da soñjal. 'Wechoù goude, on kad da gaout un tamm keuz met dre vras, 90% eus ar goulennoù 'vez graet din e lâran ya. 'Wechoù 'n em lakaan en trubuilh ma-unan met, bon, lâret a ran ya, alies.







*veze, n'ez ae, gervel, etrezek, abaoe, deoc'h, degouezhet, a-wechoù(?), traoù, en devez, sachadenn alan, forzh, dra-mañ-dra, o devo, bleud, diouto, en devez, seurt, buhez, den-mañ-den, deskiñ, pinvidik, o farkoù, fenoz, levrioù,diskouezet, abaoe, abalamour da betra, hennezh, daoust hag-eñ, ac'hanon, fall, poazhet, choudouron,

 

> Selaouit atersadenn Yann Ber Guyader amañ :

lodenn 1
lodenn 2
lodenn 3
lodenn 4