Pierre-Emmanuel Marais

Ganet on e Naoned e 1968. Ma familh a zo orin eus kornog Bro-Frañs, dreist-holl eus Bro-gKastell-briant met bet int bet o vevañ e Bro-Wenn, e-pad an eil brezel.

Kroget 'm eus da zeskiñ brezhoneg dek vloaz 'zo gant ar gevredigezh Kentelioù an noz e Naoned. Roet em eus ivez kentelioù da dud-deuet e-pad 5 bloaz.

Skrivañ a ran abaoe pell. Skrivet 'meus ur stur-levr divyezhek diwar-benn Naoned embannet gant Yoran embanner e 2006. Ur romant polis e galleg em eus skrivet ivez met d'ar c'houlz-se n'em eus kavet embanner ebet evit e embann.
Abaoe un nebeut bloavezhioù em eus kroget da skrivañ e brezhoneg ha tamm-ha-tamm e teu. Kalz a blijadur em eus o sevel istorioù e brezhoneg. Me 'gav disheñvel ar skrivañ e brezhoneg eget ar skrivañ e galleg. Penaos ? N'ouzon ket resis. Moarvat e chom ar brezhoneg un tammig hud evidon, ur yezh a lak ac'hanon da huñvreal...

 

Embannet eo bet daou zanevell em eus skrivet gant Al Liamm. Evit "Ronan ar c'horrigan" on bet awenet gant ma bugale hag en o zouez gant ma mab Brieg eveljust. Ur paotr nav bloaz eo. Pa oan krennard e plije din lenn troioù-kaer Walter Scott pe Skiant-Faltazi ("Dune" da skouer) hag istor "Troioù-kaer Duncan O'Hara" a zo bet levezonet un tamm anezhi gant seurt lennegezh.